Meta dhe Osmani urojnë Begajn për zgjedhjen si president

Presidenti Ilir Meta ka uruar Bajram Begajn për zgjedhjen si Kryetari i ri i Shtetit. Urimin, Meta e ka dhënë përmes një postimi në rrjetet sociale.

“Urime Presidentit të zgjedhur sot nga Kuvendi i Shqipërisë, z.Bajram Begaj!”, shkruan Meta.

Një urim për Begajn, ka ardhur edhe nga Presidentja e Kosovës, Vjosa Osmani.

Osmani i ka uruar suksese Begajn në këtë post, duke shtuar se do të punohet për t’i thelluar raportet vëllazërore midis Kosovës dhe Shqipërisë.

“Urime të përzemërta për presidentin e sapozgjedhur të Shqipërisë, z. Bajram Begaj! Ju uroj suksese në rolin tuaj të ri dhe shumë të rëndësishëm. Së bashku do të punojmë që raportet vëllazërore ndërmjet Kosovës e Shqipërisë t’i thellojmë edhe më tej, si dhe t’i sjellim vendet tona më afër BE-së”, u shpreh Osmani në rrjetet sociale.

Bajram Begaj është zgjedhur Presidenti i ri i Republikës së Shqipërisë. Në votimin që u krye në seancën plenare në Kuvend, morën pjesë 83 deputetë.

Begaj u zgjodh me 78 vota pro, teksa 4 deputetë votuan kundër dhe pati një abstenim.

LEXONI GJITHASHTU

• Bajram Begaj zgjidhet Presidenti i ri i Shqipërisë
• Rama: I kemi dhënë Shqipërisë një president normal