Shifra të frikshme në Maqedoninë e Veriut, 196 raste dhe 8 të vdekur nga COVID-19 në 24 orë

Maqedonia e Veriut ka shënuar sot një tjetër rekord negativ sa i përket rasteve me COVID-19.

Ministria e Shëndetësisë në RMV bën me dije se gjatë 24 orëve të fundit janë identifikuar 196 raste të reja me COVID-19, në 1213 testime të kryera, ndërkohë që 8 persona kanë humbur jetën për shkak të virusit.

Shkupi vijon të mbetet qendra e epidemisë, me 90 raste të reja në 24 orë.

Deri tani në Maqedoninë e Veriut janë kryer 42.262 testime, nga të cilat kanë rezultuar pozitive me COVID-19, 3895 persona.

Numri i personave që kanë humbur jetën deri tani nga coronavirus, në Maqedoninë e Veriut është 179.

Ndërkohë, Ministria e Punëve të Brendshme në Maqedoninë e Veriut, ka njoftuar se gjatë 24 orëve të fundit në mbarë vendin 790 personave iu është dhënë vendim për izolim, ndërsa 214 të tjerë kanë nënshkruar vendim për vetizolim si pasojë e pandemisë COVID-19.

Policia ka kryer kontrolle të rregullta ndaj personave që gjenden në izolim dhe vetizolim ku janë regjistruar gjashtë shkelje të masës së izolimit-vetizolimit. Nga MPB gjithashtu informojnë se 1071 persona kanë shkelur masën për mbajtjen e pajisjeve mbrojtëse, gjegjësisht mbajtjen e maskës.