Situata e COVID-19 në RMV nuk njeh përmirësim, 9 viktima e 162 të infektuar

Numri i të infektuarve me COVID-19 në Maqedoninë e Veriut vijon të rritet çdo ditë me numra alarmantë. Vetëm në 24 orët e fundit nga testimi i 778 personave, 162 prej tyre kanë rezultuar pozitivë me coronavirus. Shumica e të infektuarve janë nga Shkupi, 92 persona dhe Tetova me 32.

Ndërkohë, gjatë ditës së fundit 9 persona kanë ndërruar jetë. Dy prej tyre kanë vdekur në  Klinikën Infektive, ku bëhet fjalë për një pacient 62 vjeç nga Tetova, i shtruar në spital një ditë më parë dhe një tjetër po i të njëjtës moshë nga Shkupi, i shtruar në spital tre ditë më parë.

Sa i takon numrit të personave të shëruar, në 24 orët e fundit kanë lënë spitalet 5 pacientë. Deri tani në Maqedoninë e Veriut janë kryer mbi 43 mijë teste të COVID-19 nga të cilët 4 057 kanë rezultuar të infektuar. Në total, numri i pacientëve të shëruar është 1 710 kurse numri i rasteve aktive është 2 159 persona.