Shkodra pikë e nxehtë kanabisi, në pak ditë zbulohen dhjetëra parcela

Shkodra duket se do të jetë një hot/spot për këtë vit sa i takon kultivimit të kanabisit. Historikisht një zonë me risk, në vetëm pak ditë në këtë qark janë zbuluar dhjetëra parcela.

Krehja e zonës nga policia e Shkodrës, ka bërë që në këtë qark të konstatohet rritje e kultivimit të kanabisit në tokë të hapur.

Në fshatin Vallas policia lokale arrestoi 6 persona, sekuestroi 246 kg kanabis dhe asgjësoi qindra bimë në proces tharje e të mbjella.

Organizatorët e parcelave dhe rekrutuesit e punonjësve Admir Selgjekaj e Arian Popa u shpallën në kërkim bashkë me 6 persona të tjerë.

Pak ditë më parë policia e Shkodrës zbuloi disa parcela edhe në Velipojë për të cilat përfunduan në pranga 4 efektivë për shpërdorim detyre.

Edhe fluturimet e para të Guarda Di Financa janë fokusuar në zonën veriore të vendit e cila klasifikohet me risk.

Burime nga policia bëjnë me dije për Euronews Albania se në rastet e konstatuara deri më tani është vënë re se trafikantët po përdorin farën 3-mujore, e cila ka prodhim më të ulët por korret më shpejt.

Sipas raportit të prokurorisë, gjatë vitit 2021 në vend u rrit me 10 % numri i procedimeve për kultivim kanabisi, në krahasim me 2020-ën.

LEXONI GJITHASHTU:

• Sekuestrohen 246 kg kanabis në Shkodër, në kërkim dy organizatorët
• 5 vlonjatë arrestohen me 20 kg kanabis në Kukës