Edhe një funksionar i Maqedonisë së Veriut i dyshuar në rastin “Zhvatja”

Prokuroria Themelore e Maqedonisë së Veriut ka paralajmëruar se nesër do të ngrejë akuzë kundër të dyshuarve në rastin “Zhvatja”. Deri më tani vetëm tre persona kanë qenë të dyshuar, ndërsa listës së të dyshuarve do ti shtohen edhe katër persona, në mesin e të cilëve edhe një funksionar aktual.

Prokurori publik Lubomir Joveski u shpjegoi gazetarëve se veprat penale me të cilat ngarkohen janë pastrim parash, mashtim dhe ndihmë në mashtrim. I akuzuari kryesor, Bojan Jovanovski ngarkohet me veprën e pastrimit të parave dhe mashtrimit, ndërsa të akuzuarit e tjetër për ndihmë. 

“Do hapim hetim edhe për katër persona. Për veprimet që i keni theksuar edhe ju gazetarët, për pagesat prej 720 mijë eurosh nga një firmë e Strugës dhe një e Manastirit. Ditëve në vazhdim do ti marrim në pyetje. Prokurori publik në mënyrë shtesë do të vendosë se çfarë propozimesh për masë kujdesi do të kërkojë” deklaroi shkurt Lubomir Joveski, prokuror publik në Maqedoninë e Veriut

Nesër në konferencë për mediat, prokuroria themelore do të japë detaje shtesë lidhur me ecurinë e hetimeve në rastin “Zhvatja”

Rasti “Zhvatja” është një prej skandaleve më të mëdha korruptive aktualisht në Maqedoninë e Veriut, për shkak të përfshirjes së zyrtarëve të lartë, në mesin e të cilëve edhe ish prokurorja speciale Katica JAneva, e cila sipas prokurorisë, duhej ti shpëtonte nga përndjekja autorët e veprave penale, në këmbim të shumave të majme të parave.