Civilëve në Lysychansk u kërkohet të evakuohen ndërsa forcat ruse po afrohen

Civilëve në Lysychansk u është kërkuar të largohen menjëherë, pasi forcat ruse fitojnë terren në qytetin e fundit të mbetur që Ukraina mban në rajonin lindor të Luhanskut.

“Për shkak të kërcënimit real për jetën dhe shëndetin, ne bëjmë thirrje për evakuim të menjëhershëm. Situata në qytet është shumë e vështirë,” tha në Telegram Serhiy Hayday, kreu i administratës ushtarake rajonale të Luhansk.

Videot nga Lysychansk sugjerojnë se disa civilë hezitojnë të largohen nga shtëpitë e tyre, pavarësisht se kush e kontrollon qytetin.

Ka rreth 10 mijë deri në 15 mijë njerëz ende në Lysychansk, me vetëm rreth 50 njerëz që largohen çdo ditë, sipas Shybiko Valerii, kreut të Administratës Ushtarake të Lysychansk të Ukrainës.