​Osmani: Kundërshtoj çdo kriter të ri për liberalizim të vizave

Presidentja e Kosovës, Vjosa Osmani kundërshton çdo udhërrëfyes shtesë apo rivlerësim të kritereve për liberalizmin e vizave.

Në një intervistë për Kosova Press, ajo tha se ua ka bërë të qartë të gjithë përfaqësuesve të Bashkimit Evropian që Kosova nuk do të bëhet pjesë e asnjë iniciative, e cila do të stërzgjaste procesin për lëvizje të lirë.

Kryetarja e shtetit shprehet se Kosova i ka përmbushur të gjitha kushtet, duke theksuar se vendimi për liberalizim është vonuar.

“Ne kërkojmë që të trajtohemi ashtu siç janë trajtuar shtetet e tjera, në. Unë e kam bërë të qartë për të gjithë përfaqësuesit e Bashkimit Evropian që nëse mendohet një qasje e tillë natyrisht që nuk do të jetë e pranueshme për ne dhe nuk do të bëhemi pjese e iniciativave të tilla të cilat kanë për qëllim ta stërzgjatin edhe më shumë këtë proces i cili tashmë është vonuar për më shumë se katër vite”, tha Osmani.

Ajo tregon se ka marrë përgjigje nga shumica e zyrtarëve të Bashkimit Evropian që nuk ekziston synimi për kritere shtesë.

Javën që shkoi, presidentja e Kosovës mori pjesë në Samitin BE-Ballkani Perëndimor ku theksoi kërkesën për liberalizim të vizave për qytetarët e Kosovës, si i vetmi vend që ende nuk gëzon lëvizjen e lirë pavarësisht plotësimit të kritereve.

LEXONI GJITHASHTU:

• Serbia pas reciprocitetit: Kosova po përgatit konflikt të madh
• Një tjetër shtet ka tërhequr njohjen e Kosovës, sipas Vuçiç