Shoqata e Avokatëve vijon bojkotin për masat e sigurisë dhe seancat gjyqësore

Shoqata e Avokatëve Penalistë ka vendosur që të bojkotojë seancat për masat e sigurisë për 10 ditët e ardhshme dhe pa afat seancat gjyqësore.

Lajmi është bërë i ditur nga kryetari i kësaj shoqate, Saimir Vishaj në një deklaratë për mediat këtë të premte.

“Shoqata sot ka vendosur të vazhdojë bojkotin për 10 ditë për masat e sigurimit dhe pa afat për seancat gjyqësore”, u shpreh ai.

Vishaj bëri me dije se shoqata do t’i drejtohet Ministrit të Drejtësisë, Ulsi Manja që të kryejë rolin e negociatorit midis avokatëve dhe Këshillit të Lartë Gjyqësor (KLGJ).

Sipas tij, situata është shumë e rëndë dhe njëra nga palët duhet të ulet. Vishaj shtoi se Manja duhet të bledhë kryetarët e Dhomave Vendore të Avokatisë.

“Shoqata ka vendosur që t’i drejtohet ministrit të drejtësisë për të shërbyer si negociator ndë mjet dhomes së Avokatëve të Shqipërisë dhe KLGJ-së. Është një situatë shumë e rëndë. Ministri duhet të mbajë një qendrim. Nuk ka ndodhur në asnjë vend të botës që avokatët bojkotojnë masat e sigurimit. Njëra nga palët duhet të ulet. Shoqata do t’i drejtohet ministrit. Sot do ia bëjmë kërkesën edhe me shkrim”, theksoi Vishaj.

Harta e re gjyqësore parashikon në total 13 gjykata të shkallës së parë, 2 gjykatë administrative dhe shkrirjen e gjykatave të apelit në një të vetme. Avokatët i kërkojnë qeverisë të mos e miratojë këtë skemë.

LEXONI GJITHASHTU

• Harta e re gjyqësore, avokatët vendosin bojkot të përgjithshëm pa afat
• Dita e dhjetë e bojkotit të avokatëve kundër hartës së re gjyqësore