Kryeministri holandez: Mbështesim propozimin francez për RMV-në

Kryeministri holandez, Mark Rutte deklaroi se Holanda mbështet propozimin francez për zgjidhjen e kontestit midis Maqedonisë së Veriut dhe Bullgarisë.

Deklaratën, Rutte e dha këtë të hënë nga Amsterdami në një konferencë të përbashkët për shtyp, me kryeministrin Edi Rama.

Sipas tij, ky propozim trajton të gjitha shqetësimet e mbetura midis dy vendeve.

“Ne mbështesim propozimin francez për heqjen e pengesave që në këtë moment po bllokojnë Maqedoninë e Veriut dhe Shqipërinë në procesin e anëtarësimit dhe propozimi trajton të gjitha shqetësimet e mbetura”, tha ai.

Rutte shtoi se vendet e Ballkanit Perëndimor po punojnë fort që të bëhen anëtare të BE-së dhe Shqipëria ka mbështetjen e plotë të Holandës.

Këtë të hënë në RMV kanë vijuar konsultimet për propozimin francez për fillimin e negociatave të Maqedonisë së Veriut me Bashkimin Evropian.

Propozimi francez u shqyrtua dje edhe nga Këshilli i Sigurisë, të cilin e thirri presidenti Stevo Pendarovski. Kreu i shtetit pas seancës deklaroi se propozimi francez është i pranueshëm.

Propozimi mbërriti në Shkup të enjten e më pas kryeministri Kovaçevski paralajmëroi proces të gjerë konsultativ me koalicionin qeveritar, presidentin Kuvendin, opozitën, si dhe me shoqërinë civile.

LEXONI GJITHASHTU

• Opozita shqiptare në RMV pranon propozimin francez
• Propozimi francez, vijojnë konsultimet mes palëve në Maqedoninë e Veriut