Maqedonia e Veriut hap kufijtë, asnjë pengesë për hyrje-daljet

Qeveria e Maqedonisë së Veriut ka marrë këtë të martë vendimin për hapjen e të gjitha pikave kufitare. Në çdo pikë do të rikthehet normaliteti, siç ishte para pandemisë ku për personat që do të hyjnë apo dalin nuk do të kërkohet test për COVID-19.

Vendimi i miratuar sot do të hyjë në fuqi më 26 qershor. Nga e premtja bashkë me kufijtë tokësore do të hapen dhe aeroportet e Shkupit dhe Ohrit.

Bashkë me hapjen e kufijve, qeveria e Maqedonisë së Veriut ka hequr dhe kufizimet sa i takon funksionimit të bizneseve, duke lejuar funksionimin e ambienteve të brendshme të restoranteve, palestrat si dhe transportin në grup.

Ndërkohë, vetëm pak ditë më parë, Mali i Zi vendosi të mbyllë kufirin me Shqipërinë pas rritjes së numrit të rasteve me Covid-19, duke lejuar kalimin e vetëm atyre qytetarëve që paraqesin një analizë të 48 orëve të fundit ndaj virusit. Ndërkohë për shtetasit e huaj, lëvizja është e lirë.

Një rregullt të tillë, autoritetet e Malit të Zi e kanë vendosur dhe për Kosovën, Bosnjën dhe Italinë. Ndërkohë, Shqipëria nuk ka asnjë kufizim sa i takon kalimit në pikat doganore.