‘Një i punësuar për çdo familje’, nisma në Kosovë për njerëzit në nevojë

Qeveria e Kosoves ka ndërmarrë edhe një nismë te re per t’iu dalë në ndihmë qytetarëve në kohë krize.

Ajo ka nisur programin ‘Qeveria për familjen’, përmes të cilit synon që për çdo familje në Kosovë të punësojë një person.

Për këtë, bizneset apo edhe kushdo që e punëson dikë, do të subvencionohet deri në 70 për qind të pagës bruto.

Detajet për këtë program i dha të hënën ministri i Financave, Herkuran Murati.

“Bizneset që punësojnë dikë nga familjet që nuk kanë asnjë të punësuar, t’i mbështesim 70 për qind të pagës bruto. Subvencionimi është deri në vlerën 300 euro”, tha ai.

Murati sqaroi se si për bizneset që kerkojnë punëtor, si për të interesuarit për punë, procedurat do të kryhen përmes Agjencisë së Punës.

“Ata persona që mund të konsiderohen mbajtës të familjes, do të lajmërohen nga Agjencia e Punës në zyrat rajonale, të dorëzojnë informacionet e nevojshme dhe të tregojnë se për cilat fusha janë të interesuar që të punojnë.

Të gjithë të interesuarit për të perfituar nga ky program, duhet t’i takojnë grupmoshës 18 deri 64 vjeç.

Po ashtu, bizneset duhet të ofrojnë kopjen e certifikatës së biznesit apo OJQ-së, atë të letërnjoftimit të pronarit dhe listën e të punësuarve të vërtetuar nga Administrata Tatimore e Kosovës.

Ndërsa të interesuarit për punësim duhet të paraqesin kopjen e letërnjoftimit dhe kualifikimet në punë.

Ndaj ketij vendimi ka reaguar Partia Demokratike e Kosovës.

Koordinatori i Departamentit për Financa në Kabinetin për Qeverisje të Mirë, Arben Mustafa, ka kritikuar Qeverinë e Kosovës për eksperimentim me paranë publike, në mungesë të aftësisë për të menaxhuar krizën financiare në Kosovë. Sipas tij, ky vendim është populist.

LEXONI GJITHASHTU

• Qeveria e Kosovës: Çdo familje, një anëtar të punësuar
• Kosova nis të hënën skemën e mbështetjes