Von der Leyen: Shqipëria do të bashkohet me Mbrojtjen Civile Europiane

Presidentja e Komisionit Europian, Ursula Von der Leyen e cilësoi një moment historik konferencën e parë ndërqeveritare për Shqipërinë dhe Maqedoninë e Veriut.

Ajo u shpreh se ky është sukses i dy qeverive dhe qytetarëve që kanë punuar shumë, kanë pasur besim dhe vullnet.

Media e lirë, reformat, modernizimi i ekonomisë dhe bashkimi i shtetit ligjor ishin disa nga ndryshimet që diplomatja renditi, ndërsa shtoi se pikërisht këto ndryshime po sjellin cilësi më të mirë jetese.

Von der Leyen sqaroi se Shqipëria do të bashkohet me Mbrojtjen Civile Europiane e rrjedhimisht do të ketë më shumë mbështetje në situata emergjente të shkaktuara nga fatkeqësitë natyrore.

Sa i takon Maqedonisë së Veriut, komisionerja tha se do të diskutohet marrëveshja Frontex.

Suksesin për konferencë, Von der Leyen ia dedikoi dhe presidencës çeke gjithashtu. Në fund të fjalimit të saj falënderoi Ramën dhe Kovaçevskin për lidershipin dhe durimin e treguar.

Këtë të martë në Bruksel u zhvillua Konferenca e parë Ndërqeveritare mes Shqipërisë dhe Bashkimit Evropian.

Hapja e negociatave do të thotë një proces teknik që do të nisë me kontrollin e plotë të administratës shtetërore shqiptare dhe të gjithë legjislacionit shqiptar që të përafrohet me legjislacionin e Bashkimit Europian.

LEXONI GJITHASHTU:

• Rama për konferencën e parë: Shqipëria ulet në tryezën e Europës së Bashkuar