Meta po sulmon dhe shantazhon Autoritetin e Dosjeve, pretendon Rama

Kryeministri Rama ka reaguar për herë të parë në lidhje me debatin për dosjet e bashkëpunëtorit të ish-sigurimit të shtetit me inicialet I.M, për të cilin Autoriteti i Dosjeve pretendon se është ish-presidenti, Ilir Meta.

Në një postim të gjatë në rrjetet sociale, Rama akuzon Metën se po e shantazhon kryetaren e Autoritetit të Dosjeve, Genta Sula, ndërsa Sali Berishën e cilëson si nismëtarin e kësaj ngatërrese.

Rama pretendon se nuk ka folur me zonjën Sula as pas publikimit të lajmit nga Autoriteti i Dosjeve.

Sipas kryeministrit faktet janë ato që flasin kundër Ilir Metës.

“Nuk më duket se flet në favor të këtij të fundit edhe shpërthimi i tërbimit karakteristik, me piskama e lëvizje të pakontrolluara të krahëve – i ndodh në fakt sa herë ndjen shpinën t’i prekë lagështirën e një lloj muri që i prish gjumin dhe i merr peng imagjinatën,” shkroi Rama, ndërsa tha se ky është thjesht mendimi i tij, ndërsa shantazhi i Metës ndaj Sulës është real.

Ndërsa thekson se propozimin për të vënë në atë pozicion Genta Sulën e ka dhënë vet Ilir Meta, Rama shton gjithashtu se i beson Autoritetit të Dosjeve.

LEXONI GJITHASHTU:

• Rama zbulon prapaskenat, si shkoi Genta Sula kryetare te Autoriteti i Dosjeve