Të hënën nis reciprociteti, qytetarët informohen për pajisjen me targa “RKS”

Nga data 1 gusht deri më 30 shtator 2022, në Kosovë do të fillojë organizimi i procesit për regjistrimin e targave ilegale në ato “RKS”, në të gjitha Qendrat për Regjistrimin e Automjeteve.

Në lidhje me këtë vendim, qeveria e Kosovës, por edhe Ministria e Brendshme kanë vijuar fushatat informuese për qytetarët.

Përmes një njoftimi për mediat, fushata informuese iu drejtua qytetarëve të cilët posedojnë targat “PR”, “KM”, “PZ”, “GL”, “UR”, “PE”, “DA”, apo “ĐA”, duke shpjeguar mënyrën si të aplikojnë dhe të pajisen me targa “RKS”.

Qendrat e Regjistrimit të Automjeteve kanë vazhduar më tej me përgatitjet në të gjitha komunat në Republikën e Kosovës, për të mirëpritur të gjithë pronarët e automjeteve.

Gjithashtu, nga e hëna, shtetasit e Serbisë që do të hyjnë në Kosovë, do të pajisen me një ‘dokument hyrje/dalje’.

Kosova brenda territorit të saj i bën të pavlefshme dokumentet e lëshuara nga autoritetet serbe, si masë reciprocitetit ndaj shtetit që nuk i njeh dokumentet identifikuese të lëshuara nga Kosova.

LEXONI GJITHASHTU

• Nga 1 gushti serbët s’futen dot në Kosovë me dokumentet e tyre
• Reciprociteti për targat, Vuçiç: Jam i shqetësuar
• Nga 1 gushti, nis regjistrimi i targave ilegale në “RKS” në Kosovë