Protokollet e sigurisë për turizmin, gjobë 700 mijë lekë dhe deri në mbyllje të biznesit

Resortet, hotelet dhe restorantet të cilat nuk do të respektojnë protokollet e sigurisë të miratuara nga Ministria e Shëndetësisë rrezikojnë gjobë nga 700 mijë lekë. Propozimi i Ministrisë së Shëndetësisë u miratua në Komisionin e Ligjeve ku u diskutuan ndryshimet që do të bëhen në Aktin Normativ për masat ndaj CVODI-19.

Mira Rakacolli, zv. ministre e Shëndetësisë, e cila gjithashtu është drejtuese e Komiteti të Ekspertëve tha se në rast të përsëritjes së shkeljes të merret masë për mbylljen e aktivitetit.

“Në propozojmë që, nëse strukturat që ofrojnë veprimtari turistike në zonën e plazhit nuk respektojnë protokollet higjieno-sanitare të penalizohen me një gjobë që shkon në vlerën e 700 mijë lekëve. Në rast se mos zbatimi i protokolleve përsëritet, masa të shkojë deri në mbyllje të veprimtarisë. Ka qenë një propozim i diskutuar në Komitetin e Ekspertëve dhe që i ka propozuar Ministrisë së Shëndetësisë dhe Ministrisë së Brendshme të propozojnë këtë ndryshim në Aktin Normativ”, u shpreh znj. Rakacolli.

Miratimi vjen në një kohë kur sapo ka filluar sezoni turistik i cili është më I vështiri që po përballen operatorët turistik për shkak të pandemisë. Për këtë deputetët kërkuan që të nisë një fushatë informimi për operatorët për gjobat që rrezikojnë nëse nuk respektohet protokolli i sigurisë.