Mediat serbe: Kurti dhe Vuçiç pritet të nënshkruajnë deklaratë për të pagjeturit

Kryeministri i Kosovës, Albin Kurti dhe Presidenti i Serbisë, Aleksandër Vuçiç pritet të nënshkruajnë një deklaratë të përbashkët për të pagjeturit, në takimin që do të zhvillohet më 18 gusht në Bruksel.

Sipas medias serbe Nova, për tekstin është rënë dakord nga të dyja vendet dhe nënshkrimi i kësaj deklarate shihet si një hap përpara në marrëdhëniet dypalëshe.

Agjenda ende nuk dihet për publikun, ndërsa pala serbe pret që në Bruksel të diskutohet për targat e automjeteve dhe dokumentet e identifikimit.

Kryetari i Komisionit të qeverisë së Serbisë për personat e zhdukur, Veljko Odaloviç theksoi se nënshkrimi i kësaj deklarate ishte diskutuar edhe në raundet e mëparshme.

Ftesa e përfaqësuesit të Lartë të BE, Josep Borrell për Kurtin dhe Vuçiçin, erdhi në kohën e rritjes së tensioneve në veri të Kosovës, pasi serbët lokalë vendosën barrikada për të kundërshtuar dy vendime të qeverisë që kishin të bënin me dokumentet dhe targat serbe.

Barrikadat u hoqën pasditen e 1 gushtit dhe kryeministri Kurti u zotua se do të shtyjë për një muaj zbatimin e këtyre dy vendimeve.

LEXONI GJITHASHTU

• Kurti: Serbët të marrin targat e Kosovës, barrikadat u vendosën me urdhër nga lart
• Stoltenberg: Kosova dhe Serbia të shmangin veprimet e njëanshme
• Vuçiçit i kërkohet debat në Kuvend për reciprocitetin me Kosovën