Korçarët preferojnë qumështin te fshatarët, rriten çmimet në dyqan

Me dhjetëra fermerë nga fshatrat e Korçës bëjnë çdo ditë rrugën për të shitur në qytet qumështin që prodhojnë.

Të stacionuar në trotuar, identifikohen lehtë nga ata që duan të blejnë qumësht. Shitësit tregojnë se kohët e fundit e kanë rritur me 20 lekë qumështin, ndërsa njerëzit që blejnë janë të shumtë.

“Po e shesim, shkon me aq sa e japim ne shkon. E kemi rritur 20 lekë, çdo gjë po bëhet dyfish. Me zor na del,. Shteti s’na ka ndihmuar me asgjë. Ne nga dy lopë mbajmë, e pëlqejnë se ndryshe se merrnin, ua sjellim me gjithë ajke. Gjithë jetën e kam bërë këtë punë.  Vështirësitë bli andej bli ketej, të gjitha shpenzimet i kemi”, shprehen ata.

Nga ana tjetër, ata që e blejnë tek këta shitës ambulantë ndihen të sigurtë për atë çka konsumojnë.

“Me pëlqen, është shumë i mirë ndaj e blej. Kam besim. Është i sigurt, kam gjithë këtë kohë që e marr, është shumë i sigurt. Nuk blej në dyqane qumësht. E blejnë shumë gra korçare ja ku janë faktet, nuk është nevoja të tregoj”, thotë një prej tyre.

Përpos rritjes së çmimit të qumështit, janë rritur dhe çmimet e nënprodukteve të tij.

LEXONI GJITHASHTU

• Rritet çmimi i bulmetit, qumështi 30 lekë më shtrenjtë, mungon djathi
• Rriten çmimet në Shqipëri, shtrenjtohen drithërat