Model i ri në Maqedoninë e Veriut, LSDM përkrahje nismës për një njësi zgjedhore

Maqedonia e Veriut nisi debatin publik lidhur me mundësinë e ndërrimit të modelit zgjedhor të shtetit, nga gjashtë në një njësi zgjedhore. Përfaqësuesit e partive më të vogla thanë se modeli i gjashtë njësive zgjedhore djeg votat e shpërndara nëpër njësi dhe nuk e reflekton vullnetin e plotë të zgjedhësve.

“Të gjithë e shohim se është nevoja për një model të ri zgjedhor. Modeli i deritanishëm na ka sjellë padrejtësi, edhe në bazë të ndarjes territoriale të njësive zgjedhore”, tha Driton Sulejmani, deputet i Partisë Alternativa

Ndërkohë, Kryeministri Zoran Zaev, në emër të partisë së tij, LSDM, i dha përkrahje të plotë nismës për një njësi zgjedhore, por tha se është pak herët për lista të hapura.

“Mendoj se është koha e përshtatshme për heqjen e sistemit dypartiak, në bllokun maqedonas dhe shqiptar…. Modeli i deritanishëm përbën rrezik për krijimin e autokracisë në shtet”, – tha Zaev.

Maqedonia e Veriut aktualisht është e ndarë në 6 njësi zgjedhore brenda territorit, ndërsa secila zgjedh nga 20 deputetë. Janë edhe 3 njësi zgjedhore në diasporë që japin nga 1 deputet, me kusht që të grumbullohet minimumi i votave me të cilat është zgjedhur deputeti i fundit në njësitë brenda vendit.