Rikthehet futbolli ukrainas, kampionati kombëtar hapet me Shakhtar-Metalist 1925

Sapo sirenat e alarmit pushuan, lojtarët e Shakhtar Donetsk zbritën në terren për stërvitjen e fundit para se në Ukrainë të nisë sezoni i jashtëzakonshëm i kampionatit të futbollit.

Ndërsa ushtarët ukrainas luftojnë me trupat ruse në jug dhe lindje, Shakhtar pritet të përballet me Metalist 1925, nga Kharkivi, mbrëmjen e së martës.

“Jeta në Ukrainë nuk ndalon, ajo vazhdon. Edhe futbolli është një nga ata faktorë që i sjell emocione gjithë vendit dhe njerëzve që po luftojnë për ne. Futbolli është jetik për ne si individë, si skuadër, por edhe për gjithë Premier Ligën Ukrainase. Ai na ndihmon të vazhdojmë jetën dhe tregon se bota e sportit nuk ndalet”, thotë Igor Jovicevic, trajner i Shakhtar Donetsk.

Ndeshja, që do të luhet në Kiev, mbahet një ditë përpara se Ukraina të shënojë 6 muaj nga nisja e pushtimit rus, një luftë që ka vrarë disa mijëra njerëz dhe zhvendosur miliona të tjerë.

Takimet këtë sezon do të luhen pa tifozë, si pasojë e rrezikut për sulme me bomba dhe raketa.

LEXONI GJITHASHTU:

• Një mision në Ukrainë, Zelensky dhe Guterres bien dakord për detajet
• Mësim në kohë lufte, Ukraina hap shkollat më 1 shtator