COVID-19 depërton në ‘Drejtësi’, SPAK dhe Apeli i Tiranës shqyrtojnë vetëm çështjet me prioritet

COVID-19 ka depërtuar në gjykata, duke kushtëzuar punën e këtyre institucioneve të cilat kanë vetëm pak javë që u rihapën.

Gjykata e Posaçme është duke punuar në mënyrë të reduktuar, për shkak se një gjyqtarë doli pozitiv ndaj testit.

Dy gjyqtarë të tjerë si dhe pjesëtarë të administratës që kanë qenë kontakte të afërt me të infektuarit janë karantinuar. Të gjitha proceset ku gjyqtari i infektuar ka qenë në trupë janë pezulluar deri në një vendim tjetër.

Ndërsa në proceset të cilat konsiderohen si emergjente, masat e sigurisë si dhe kërkesa penale janë duke u zhvilluar, por duke respektuar protokollet e sigurisë.

Edhe në Gjykatën e Apelit të Tiranës është e njëjta situatë, pasi një gjyqtar doli pozitiv ndaj testit. Ndërsa kontaktet e tij më të afërta janë karantinuar për një periudhë 14-ditore.

Për këtë shkak është vendosur që të punohet në mënyrë të reduktuar, duke shqyrtuar vetëm çështjet emergjente.

Situata është problematike edhe në Gjykatën e Apelit të Durrësit e atë të Kavajës. Proceset gjyqësore në këto institucione janë pezulluar, pasi një gjyqtar është konfirmuar se është mbartës i virusit.