Kallëzoi 7 herë vëllain, Muskurti vuante nga probleme të shëndetit mendor

Pas përfundimit të seancës gjyqësore për Arsen Muskurtin, i cili vrau vëllain dhe kunatën, dy ditë më parë në kryeqytet u zbulua se autori kishte dhe probleme të shëndetit mendor.

Gazetari i Euronews Albania Eni Ferhati tha se Muskurti mjekohej që prej vitit 2018, ndërkohë që armën e krimit e kishte me leje prej të paktën 5 vitesh.

“Avokati ka pretenduar se kjo është një ngjarje që mund të parandalohej dhe një krim i paralajmëruar pasi janë 7 kallëzime që autori i krimit Arsen Muskurti ka depozituar në Policinë e Shtetit kundër vëllait të tij dhe kunatës, kallëzime këto që sipas avokatit mbrojtës nuk janë marrë parasysh nga organet shtetërore,” – sqaroi Ferhati.

Kallzimet në polici janë bërë për shkak të konflikteve, ndërsa viktimat Dritani dhe Nora, sipas avokatit, e kanë kërcënuar Arsenin deri te fëmijët.

30 ditë burg, kërkoi avokati i cili kërkon një ekspertizë psiqike klientit të tij pasi është në gjendje të rëndë. Ndërkohë gjyqtari dhe prokurori konfirmuan se dëshmitë e Muskurtit kanë qenë ta paqarta sa i takon motivit të krimit.

Vrasja e dyfishtë në Tiranë:

Pista kryesore është ajo e një konflikti të mundshëm lidhur me biznesin e agjencisë turistike, ku dhe ndodhi ngjarja.

Në bazë të deklarimeve në Qendrën Kombëtare të Biznesit (QKB), rezulton se vëllezërit Dritan dhe Arsen Muskurti, kanë qenë bashkëpronarë deri në vitin 2018.

Më pas agjencia i ka kaluar tërësisht në pronësi Dritan Muskurtit, i cili mbeti viktimë të martën në kryeqytet.

Ndërsa, në profilin e tij në Facebook, autori i krimit Arsen Muskurti, profil të cilin e kishte me emrin Hamza Muskurti, akuzonte vëllanë dhe kunatën se kryenin veprimtari të paligjshme dhe në kundërshtim me rregullat fetare.

Si autori edhe viktimat, ishin praktikantë të fesë islame. Sipas informacioneve, kjo agjenci koordinonte dhe sponsorizonte udhëtimin drejt Arabisë Saudite të besimtarëve të fesë islame.

Nuk dihen arsyet se përse Arsen Muskurti e kundërshtonte veprimtarinë e vëllait dhe kunatës së tij. Armën me të cilin kreu krimin e rëndë, Muskurti e kishte me leje.

LEXONI GJITHASHTU:

• Prokurori përgënjeshtron ministrin Çuçi: Arsen Muskurti u dorëzua vetë