U shkarkua një ditë më parë, Nano: Rëndësi ka besnikëria ndaj parimeve

Gledis Nano u shkarkua nga pozicioni i drejtuesit të Policisë së Shtetit një ditë më parë. Përmes një letre ai ka reaguar sot, duke vlerësuar rrugëtimin e tij në atë post.

Sipas Nanos, i cili nuk bëri një analizë të punës së tij, përvoja nuk ishte e vetmja që e ndihmoi në rrugëtimin e tij, por dhe modelet e ndërtuara nga personalitetet madhorë të marrëdhënieve ndërkombëtare.

“Në mënyrë të veçantë, postet drejtuese janë dhe do të mbeten një provë karakteri për të gjithë ata që marrin përsipër detyrat e vështira dhe me përgjegjësi të lartë shoqërore. Ajo që ka një rëndësi parësore në këtë aspekt është ruajtja e tipareve identitare, thënë më qartë, mos tjetërsimi dhe qëndrueshmëria mbi parimet me të cilat jemi mbrujtur qysh në bankat e shkollës deri në ditën kur kemi bërë betimin përpara flamurit kombëtar, besnikëria ndaj të cilit mbetet akti më i vështirë por edhe më i çmuari!” shkroi Nano.

Ai falënderoi të gjithë qytetarët, policët, agjencitë ligj zbatuese, mediat dhe partnerët ndërkombëtarë. Nano uroi gjithashtu pasardhësin e tij në detyrë.

Kujtojmë se aktualisht drejtor i komanduar është zv. drejtori i Policisë së Shtetit, Tonin Vocaj.

LEXONI GJITHASHTU:

• Hoxha: Gledis Nano nuk u bë ‘ushtari’ i Edi Ramës
• Gazetari: Çështja e Ervis Martinajt, kulmi i përplasjeve mes Gledis Nanos dhe Ramës
• Ngjarjet që rrëzuan Gledis Nanon, 10 muajt në krye të Policisë së Shtetit