SPAK zbulon skemën korruptive, arrestohen disa zyrtarë që merrnin para për testin COVID-19

Rritja e rasteve të COVID-19 në Shqipëri po shihet me frikë nga qytetarët, të cilët në përpjekje për të qetësuar veten, kanë tentuar të sigurojnë kryerjen e testit me anë të metodave korruptive.

Këtë të premte, Policia e Shtetit lajmëroi sot se në një operacion hetimor i drejtuar nga SPAK që ka zgjatuar rreth katër muaj është finalizuar me arrestimin e 14 personave zyrtarë të Institutit të Shëndetit Publik, të Inspektoratit Shëndetësor dhe mjekë në poliklinikën e Tiranës.

Sipas asaj që njofton Policia, SPAK-u ka dokumentuar faktin se këto persona kanë arritur të marrin ryshfet më shumë se një herë.

Policia e Shtetit theksoi se hetimet zbuluan raste të “ndërmjetësimit me qytetarë të ndryshëm për të bërë tamponin për COVID-19, kundrejt shumave monetare nga 5.000 deri 10.000 lekë të reja.”

Gjatë operacionit janë sekuestruar në cilësinë e provës materiale 1.500.000 lekë të reja dhe 2500 euro, 35 libreza shëndetësore të gjetura në disa subjekte tregtare private në qytetin e Tiranës; certifikata dezinfektimi dhe dokumente të ndryshme mjekësore që janë lëshuar në mënyrë fiktive nga punonjësit e Inspektoratit Shtetëror Shëndetësor dhe Instituti i Higjienës Tiranë; 14 aparate celulari të markave të ndryshme dhe një pajisje elektronike tablet.

Autoritetet ligjzbatuese vijojnë punën për dokumentimin e plotë të kësaj veprimtarie.