Rama: Open Balkan, mundësi e mirë për dialogun Kosovë-Serbi

Kryeministri Edi Rama mendon se nisma rajonale, Open Balkan mund të jetë mundësi shumë e mirë për Kosovën dhe Serbinë në lidhje me dialogun.

Në një intervistë për “Euronews Serbia”, Rama u shpreh se vendet e Ballkanit janë më të ngjashëm sesa ata e mendojnë.

‘Unë respektoj plotësisht sovranitetin e tyre në vendimmarrje, mënyrën se si ata duan t’i qasen kësaj çështjeje. Por besoj se Open Balkan është një mundësi e mirë për të gjithë, përfshirë ata, përfshirë dialogun Kosovë-Serbi.

Sepse, e përsëris, në fund të ditës jemi të gjithë njerëz, jemi shumë më të ngjashëm nga sa mendojmë kur shohim njëri-tjetrin nga larg dhe kur e shohim duke u bazuar tek filtrat e historisë, apo tek dhimbja e së kaluarës. Ne jemi shumë më të ngjashëm dhe duke komunikuar me njëri-tjetrin”, theksoi kreu i qeverisë shqiptare.