‘Jemi shumë larg’, batuta e Ramës për verën serbe dhe krahasimi me Vuçiç

Kryeministri Edi Rama i është përgjigjur me humor pyetjes së gazetares së Euroneës Serbia se cili është njohës më i mirë i verës, ai apo presidenti Vuçiç.

“Është si të krahasosh skuadrat legjendare të këtij vendi në basketboll me skuadrat tona legjendare, ndaj jemi shumë larg. Ai është njohës shumë më i mirë. Unë nuk jam njohës vere, thjesht më pëlqen ta shijoj ndonjëherë, por ju falënderoj që nuk më pyetët se cila verë është më e mira, ajo shqiptare apo ajo serbe, sepse në atë rast do të kishte qenë sërish tipi i pyetjes apo tipi i dilemave të cilat ne duhet me doemos t’i shmangim”, tha Rama.

Edhe pse vera shqiptare mund të jetë më e mirë se ajo serbe, tha kryrministri, ajo që i intereson rajonit është që të ketë sa më shumë gjëra të mirë për të prodhuar dhe shkëmbyer nga të gjithë, në mënyrë që të lihet pas historia dhe të intensifikohet bashkëpunimi.

“Duhet të mendojmë që është diçka e mirë që të kemi më shumë vera të mira dhe më shumë gjëra të mira në rajonin tonë. Ndaj nëse ne kemi verë të mirë dhe Serbia jo, kjo nuk është diçka e mirë për ne. Ok? Sepse ne do të kishim vetëm verën tonë të mirë. Nëse të dyja shtetet kanë një verë të mirë, të dyja palët fitojnë. Ndaj ne duhet t’i shohim gjërat në këtë prizëm. Sepse ne kemi prodhuar kaq shumë histori dhe kemi vuajtur kaq gjatë nga problemet me tretjen sa duhet të nisim të prodhojmë më pak histori dhe më shumë produkte që janë të mira për t’u ngrënë dhe të thjeshta për t’u tretur”, u shpreh kreu i qeverisë shqiptare.

LEXONI GJITHASHTU:

• Rama: Open Balkan, mundësi e mirë për dialogun Kosovë-Serbi
• ‘Njihni Kosovën’, Rama tregon çfarë i tha Vuçiç për deklaratën në Beograd