Objektet e kultit me dry, turistët e huaj nuk mund t’i vizitojnë

Kohët e fundit, një vëmendje e veçantë po i jepet objekteve të vjetra të kultit, të cilat synohen të kthehen në një atraktivitet turistik.

Në qarkun e Korçës trashëgimitë e objekteve fetare të periudhës bizantine dhe postbiznantine janë të shumta, ku disa prej tyre kanë nevojë për ndërhyrje emergjente.

Gjergji Koki, Drejtori i Drejtorisë Rajonale të Trashëgimisë Kulturore për juglindjen tregoi se Ministria e Kulturës ka miratuar së fundmi buxhetin për restaurimin e 4 kishave të vjetra.

“E ndaj për herë të parë këtë lajm, që javën e parë ne kemi kaluar në Këshillin Kombëtar të Trashëgimisë Kulturore, 4 projekte të hartuara nga Instituti i Monumenteve dhe të Trashëgimisë Kulturore dhe nga drejtoria jonë”, tha ai.

Edhe vet të rinjtë që po studiojnë për historinë dhe kulturën kanë vizituar disa prej këtyre objekteve në terren.

Nga ana tjetër, Euronews Albania takoi dy të huaj të cilët kishin ardhur në Voskopojë pikërisht për të vizituar kishat që ndodhen në këtë fshat turistik.

Ata shprehen të zhgënjyer pasi asnjëra prej tyre nuk është e hapur për turistët.

“Vijmë nga Amsterdami, kemi ardhur për të parë objektet e ikonografise, afresket por fatkeqësisht asnjëra prej tyre nuk është e hapur. Këtu nuk jeni gati të prisni turistë, edhe në Lin e kishin mbuluar mozaikun dhe nuk pamë dot gjë, kishat janë të mbyllura, askush nuk është këtu të na shpjegojë diçka. Është bezdisëse që vijmë këtu dhe nuk mund të shohim dot gjë. Ne ishim të interesuar për këto objekte sepse janë tejet të veçanta”, shprehen ata.

Në qarkun e Korçës numërohen rreth 220 objekte qe janë pjesë e trashëgimisë kulturore të popullit shqiptar, ndërkohë që shumë prej tyre, kryesisht në zonat malore, janë të dëmtuara apo rrënuara.

LEXONI GJITHASHTU

• Turizmi kulturor, Amfiteatri i Durrësit 7 mijë vizitorë më shumë se në vitin 2021
• Turizmi malor, dhjetra turistë të huaj në Theth