“Mund të ishin bërë zgjidhje më të mira”, Xhepa: Ka pasur abuzime në energji

Eksperti i Ekonomisë Selami Xhepa, teksa ka komentuar paketën e masave që prezantoi sot qeveria për kursimin e energjisë elektrike, u shpreh se ka pasur një keqmenaxhim të korporatës së energjisë dhe OSHEE-së ndërsa shtoi se mund të ishin gjetur zgjidhje më të mira për të shmangur këtë krizë.

“Duke pasur në konsideratë gjendjen sociale që ka Shqipëria, mendoj se mund të ishin bërë zgjidhje më të mira.

Këto muaj ka pasur një keqmenaxhim të korporatës energjitike dhe OSHEE-së, kjo është një problematikë serioze që ka bërë që përgjatë viteve gjendja e korporatës të mos përmirësohet nga pikëpamja financiare. Nga kjo pikëpamje është dëshmuar një menaxhim jo serioz i korporatës gjë që e gjen korporatën për t’u përballur me ndikime kaq të forta negative dhe e vendos atë në mëshirë të mbështetjes së qeverisë.”-theksoi Xhepa në një intervistë për Euronews Albania.

Xhepa ndër të tjera tha se në muajt në vijim do të ketë probleme serioze në gjetjen e tregjeve për furnizimin e energjisë elektrike.

“Gjendja ne tregjet e energjisë elektrike është problematike dhe besoj se në muajt në vazhdim do të ketë probleme serioze dhe në gjetjen e tregjeve të furnizimit me energji elektrike.  Mendoj se vendet evropiane që janë të ndikuara nga gjendja e luftës në Ukrainë kanë përjetuar një rritje dramatike të çmimeve të energjisë. “- nënvizoi ai.

Një problem tjetër sipas Xhepës është se ka abuzime dhe vjedhje të energjisë elektrike.

LEXONI GJITHASHTU: 

• Rama: Do rrisim pagat për administratën, Policinë e Shtetit dhe Policinë e Burgjeve
• Çmimi i energjisë, Rama: Mbi 800 kwh, çmim tregu për ata me vila e pishina