Basha mbështet hapjen e listave zgjedhore 100% me kushtin që koalicionet të mos ndalohen

Kryetari i Partisë Demokratike, Lulzim Basha ka folur për mediat pas përfundimit të mbledhjes që zhvilloi me aleatët në selinë blu, për ndryshimet kushtetuese sa i takon hapjes së listave dhe ndalimin e koalicioneve parazgjedhore.

Lideri demokrat e përshëndeti votimin e marrëveshjes se 5 qershorit, ndërsa tha se ky hap përbën tashmë një bazë solide për garantimin e zgjedhjeve normale në Shqipëri.

“Së pari, dua të shpreh fare qartë qëndrimin e Opozitës së Bashkuar se marrëveshja e 5 qershorit e cila më në fund u votua dje në Kuvendin e Shqipërisë është një bazë për garantimin e zgjedhjeve normale, nuk është ajo që dëshironim ne por një marrëveshje politike e arritur me ndihmën e partnerëve ndërkombëtarë të cilëve dua t’iu shpreh mirënjohjen”, tha Basha.

Ai tha se opozita e bashkuar mbështet idenë, që listat të hapen 100%, me kushtin që koalicionet parazgjedhore të vazhdojnë siç janë sot dhe përllogaritja e mandateve të mos ndryshojë.

Sipas Bashës, ky qëndrim i opozitës do të shpaloset nga Bylykbashi dhe Vasili gjatë takimit në tryezën e Këshillit Politik. 

“Ne kemi mandatuar sot përfaqësuesit tanë Oerd Bylykbashi dhe Petrit Vasili që sa i takon kësaj çështjeje të paraqesin qëndrimin e Opozitës së Bashkuar si vijon: Opozita e Bashkuar do mbështesë hapjen 100% të listave me kushtin që koalicionet të vazhdojnë siç janë sot dhe përllogaritja e mandateve siç është sot. Ky propozim do shtrohet sot në Këshillin Politik”, deklaroi kreu i PD”, shtoi ai.