Mblidhet Këshilli Politik, ekspertët do t’u përgjigjen pyetjeve të opozitës për listat e hapura

Këshilli politik është mbledhur sërish sot. Me kërkesë të përfaqësuesit të Partisë Socialiste, palët janë ulur në tryezën e diskutimeve ku ekspertët po u përgjigjen pyetjeve të ngritura në mbledhjen e kaluar, nëse amendamentet kushtetuese që janë tashme në procedurë parlamentare, lejojnë apo pengojnë hapjen 100% të listave të kandidatëve për deputetë, siç propozon opozita apo nëse amendamentet kushtetuese pengojnë koalicionet parazgjedhore.

Në këtë takim nuk kanë munguar as përfaqësuesit e opozitës, të cilët theksuan sërish se çdo diskutim mbi reformën zgjedhore duhet të diskutohet në Këshillin Politik dhe se mazhoranca duhet të heqë dore nga logjika e “faktit të kryer” për ndryshimet kushtetuese.

Për ato çështje për të cilat palët nuk do të bien dakord, opozita kërkon ekspertizën e OSBE-ODIHR. Por në një email tjetër ku i kthen përgjigje opozitës, Gjiknuri shprehet se këmbëngulja që më parë të merret ekspertiza e ODIHR, i shërben thjesht qëllimit për të bllokuar apo zvarritur në kohë miratimin e ndryshimeve kushtetuese.