Opozita bën thirrje për mosvotim të ndryshimeve kushtetuese: Njëanshmëria është rruga e autokratëve

Në një reagim të sotëm, opozita i ka bërë thirrje mazhorancës që t’i qëndrojë marrëveshjes së nënshkruar dhe të heqë dorë nga aktet e njëanshme.

Nëpërmjet një deklarate për mediat, opozita i ka bërë thirrje mazhorancës të mos votojë ndryshimet për koalicionet.

“Ndryshimet e njëanshme kushtetuese shkatërrojnë konsensusin, thyejnë dhe zhbëjnë marrëveshjet e 5 qershorit dhe të 14 janarit të nënshkruara nga vetë Partia Socialiste, dhe sjellin pasoja të rënda për stabilitetin, demokracinë dhe integrimin europian të vendit. Opozita e Bashkuar është e vendosur t’i qëndrojë me besnikëri interesit të Shqipërisë dhe shqiptarëve.

Njëanshmëria nuk është rruga demokratike për përcaktimin e rregullave të zgjedhjeve në një vend anëtar të OSBE-së.

Njëanshmëria është rruga e autokratëve që i kanë braktisur qytetarët dhe kanë frikë nga vullneti qytetar. Njëanshmëria nuk është në interes të Shqipërisë dhe të shqiptarëve dhe as në përputhje me aspiratën e qytetarëve për Shqipërinë në Europë”, thuhet në deklaratën e opozitës së bashkuar.

Më tej në deklaratë thuhet se në 5 orë mbledhje të këshillit politik, Partia Socialiste nuk dha asnjë arsye për refuzimin e propozimit tonë, duke dëshmuar edhe njëherë mungesë vullneti për dialog.

“Opozita e Bashkuar ripërsërit apelin për Partinë Socialiste, që të gjejë forcë dhe t’i qëndrojë marrëveshjeve që ka nënshkruar, duke hequr dorë nga aktet e njëanshme për ndryshimin e Kushtetutës dhe duke vijuar dialogun”, shkruhet ndër të tjera në reagimin e opozitës.