Mbyllet kolegji turk “Mehmet Akif”, qeveria: Shkolla të kthejë pagesat e nxënësve

Qeveria ka vendosur mbylljen e kolegjit turk në Tiranë “Mehmet Akif Ersoy”. Ky institucion funksiononte në Shqipëri që nga viti 1996 dhe është ndër të parat shkolla të mesme private të hapura në vend pas viteve 90’.

Vendimi i qeverisë ngarkon kolegjin që të mbulojë të gjitha shpenzimet për kryerjen e procedurave për transferimin e nxënësve. Gjithashtu në vendim, kolegjit i kërkohet që të kthejë pagesat e kryera nga prindërit për pjesën e papërfunduar të shkollimit.

Drejtuesit e kolegjit duhet të dorëzojnë në drejtorinë rajonale të arsimit gjithë dokumentet që kanë për aktivitetin arsimor.

Ekzekutimi i vendimit të qeverisë do të kryhet nga një grup pune i Drejtorisë Rajonale të Arsimit.

Në vendimin e qeverisë nuk jepen arsyet e mbylljes së kolegjit, që kryente aktivitetin prej 26 vitesh në Shqipëri.

Kolegji është pjesë e fondacionit “Gulistan”. Qeveria turke ka kërkuar prej disa vitesh mbylljen e institucioneve që financohen nga kleriku Fejtullah Gylen, i akuzuar në Turqi si pjesë e grushtit të shtetit të vitit 2016.

LEXONI GJITHASHTU:

• Ministrja Kushi tregon arsyet e mbylljes së kolegjit turk në Tiranë
• Mbyllet kopshti “Turgut Ozal’, drejtuesit akuzojnë qeverinë për vendimin