Bie numri i rasteve me COVID-19 në Maqedoninë e Veriut, katër qytetarë humbin jetën

Numri i të prekurve dhe i viktimave ka pësuar një luhatje të ndjeshme në Maqedoninë e Veriut në krahasim me një ditë më parë. Gjatë ditës së sotme shikohet një trend rënës, çka rrit më tej optimizmin tek qytetarët si dhe tek autoritetet e vendit.

Autoritet shëndetësore raportuan të dielën 85 raste të reja, ndërsa katër pacientë kanë humbur jetën nga COVID-19.

Në kryeqytetin e vendit, në Shkup, janë regjistruar 32 raste, në Kumanovë 9 raste, Shtip 9 raste, Dibër të Madhe 3 raste, Kërçovë 7 raste, Gostivar 7 raste, Manastir 4 raste, Kavadar 6 raste, si dhe nga një rast në Tetovë, Prilep, Strumicë, Demir Hisar dhe Vinicë.

Instituti i Shëndetit Publik gjatë 24 orëve të fundit ka regjistruar 45 pacientë të shëruar. Aktualisht në të gjithë Maqedoninë e Veriut kanë rezultuar pozitivë me Covid-19 gati 12 mijë qytetarë, kurse mbi 7000 janë shëruar.

Pavarësisht përpjekjeve të bluzave të bardha në Maqedoninë Veriut, që nga fillimi i pandemisë dhe deri sot, kanë humbur jetën 527 pacientë, shumica e tyre me sëmundje bashkëshoqëruese.