Protokolli për hapjen e shkollave, një nxënës në bankë dhe në distancë 1.5 metër 

Të vendosur në radhë një e nga një dhe në një largësi prej 2 metrash, nxënësve që u rikthehen bankave të shkollës në fillim të muajit shtator, do t’u matet temperatura çdo ditë. Nëse konstatohet se kanë temperaturë apo simptoma të tjera mësuesit do të njoftojnë mjekun e familjes. Këto janë disa nga masat të cilave do tu nënshtrohen nxënësit në nisje të vitit të ri shkollor.

Në protokollin e hartuar nga Komiteti i Ekspertëve theksohet se nxënësit e kanë të ndaluar të dalin nga godina e të rikthehen përsëri në të. Si nxënësit e ciklit 9-vjeçar ashtu edhe ata të ciklit të mesëm duhet të jenë të pajisur me maska, që duhet t’i mbajnë edhe gjatë procesit mësimor. Fëmijëve nuk u lejohet të konsumojnë ushqim në klasa dhe në rastet kur do të jetë e mundur mësimi do të zhvillohet dhe në oborrin e shkollës.

Ministria e Shëndetësisë thekson se çdo nxënës në shkollë duhet të lajë duart pas çdo veprimi që mund të përbëjë rrezik për përhapjen e virusit. Duhet të sigurohen nga struktura arsimore: uji i rrjedhshëm, sapuni i lëngshëm, letra për fshirjen e duarve dhe xheli me përmbajtje alkooli 60%, në të gjithë ambientet e shkollës. Nxënësit ndalohen të dalin nga klasa gjatë orëve të mësimit përveç rasteve kur u duhet të përdorin tualetet. Në këtë rast nxënësi duhet të shoqërohet, por nuk specifikohet se cili do të jetë mbikëqyrësi.

Brenda klasës nxënësit duhet që të qëndrojnë të ulur nga një nxënës në bankë dhe bankat në të paktën 1.5 metra larg njëra-tjetrës, por nuk specifikohet numri i nxënësve që duhet të jenë në një klasë, ndërsa theksohet se kur nuk është e mundur të ruhet distanca, nxënësit do të ndahen në klasa të tjera. Për nxënësit që nuk i zbatojnë rregullat do të ketë masë disiplinore nga Komisioni i Etikës dhe i Sjelljes.