“Rama të dërgojë prova në KiE”, Gashi: ‘Dick Marty’ rrëzohet me një vendim gjykate

Avokati Tomë Gashi, në një intervistë për Euronews Albania, theksoi se kryeministri Edi Rama duhet të dërgojë prova në KiE, se në Shqipëri e në Kosovë nuk janë kryer krime lufte.

Gashi theksoi se Rama në Strasburg foli si një shqiptar i vërtetë, por nuk dërgoi prova në mënyrë që raporti i ‘Dick Marty’ të rrëzohet.

“Rama nuk ka qenë kurrë kundër Gjykatës Speciale.  Kjo është një marrëveshje ndërkombëtare dhe kjo nuk mund të zhbëhet kaq lehtë. Rama do të duhej të shkonte me një dokument të Prokurorisë në Strasburg, për “Shtëpinë e Verdhë”. Nuk kemi një vendim përfundimtar. Rama nuk i ndihmoi fare ish-ushtarët e UÇK-së.

Rama ndihmoi opinionin e brendshëm në Shqipëri e në Kosovë që të ketë një popullaritet më të madh. Rama foli si shqiptar por nuk dërgoi prova, se për çfarë arsye duhet që të ketë një raport tjetër që ta mohojë raportin e Dick Marty-t, i cili mund të rrëzohet me një vendim Gjykate”- u shpreh Gashi.

Më tej ai theksoi se krimet e luftës janë kryer nga serbët, ndërsa theksoi se deri më tani nuk kemi një vendim të Gjykatës apo Prokurorisë në Shqipëri që të vërtetojë se nuk ka pasur kurrë trafikim të organeve njerëzore.

“Krimet e luftës i kryen forcat serbe, dhe raporti i Dick Marty ishte një mashtrim. Bëri mirë që Parlamenti i Shqipërisë nxori një rezulutë me të cilën pretendon që ta shuajë raportin e Dick Marty, po ajo që mua më brengos është se nuk kemi një vendim të Gjykatës apo të Prokurorisë që ta vërtetojë njëherë e përgjithmonë që nuk ka pasur kurrë trafikim të organeve njerëzore. Procesin nuk e lehtësoi fjalimi i Ramës”- tha Gashi.

LEXONI GJITHASHTU: 

• Raporti i Dick Marty, paralajmërimi i Ballës për Berishën
• A mund të rrëzohet rezoluta e Dick Marty? Çollaku: Mision i pamundur