Abdixhiku paralajmëron Kurtin: Kosova nuk mund të ecë pa përkrahjen e SHBA-ve

Kryetari i Lidhjes Demokratike të Kosovës, Lumir Abdixhiku thotë se investimi më i madh i Serbisë, ka qenë krijimi i bindjes se vendi duhet të ecë pa aleatë.

Përmes një postimi në rrjetet sociale, Abdixhiku u shpreh se Kosova nuk mund të bëjë përparim pa mbështetjen e SHBA-ve, duke paralajmëruar kryeministrin Albin Kurti, pasi ky i fundit nuk dëgjoi thirrjet e ndërkombëtarëve për shtyrjen e zbatimit të vendimit për targat.

“Investimi më i madh i Serbisë në Kosovë ka qenë krijimi i bindjes se vendi ynë duhet të ecë pa aleatë; në veçanti pa koordinim me ShBA-të. Ky investim ka prekur figura me ndikim në pushtet siç ka prekur dhe analistë të pushtetit që në vazhdimësi ushqejnë këtë bindje. Kush do ta kishte menduar një fitore të tillë të Serbisë?! As në ëndërrat më të mira të tyre, nuk është menduar që Kosova do të normalizojë distancimin nga aleatët tanë kaq lehtë e kaq shpejtë.

As në ëndërrat më të mira të Serbisë nuk është pritur ky përfundim i Kosovës me shtetet që i kanë dhënë dhe lirinë, dhe demokracinë dhe pavarësinë. Koha për refuzim dhe përballje të kësaj influence në vendimmarrje shtetërore e në diskurs publik. Nuk guxojmë një grup mjeranësh të na sjellin në këtë pozitë. Ta lësh Kosovën pa aleatë, është tradhëti. Kërkesa për ecje me ShBA është akt patriotik’, shkroi Abdixhiku në Facebook.