Polonia i kërkon Gjermanisë të dërgojë raketa “Patriot” në Ukrainë

Ministri polak i Mbrojtjes, Mariusz Blaszczak tha të mërkurën se i kishte kërkuar Gjermanisë që të dërgonte raketat “Patriot” në Ukrainë.

“Pas sulmeve të mëtejshme raketore ruse, i kërkova Gjermanisë që raketat Patriot që iu ofruan Polonisë, të dërgoheshin në Ukrainë dhe të vendoseshin në kufirin e saj perëndimor”, shkroi Blaszczak në Twitter.

Gjermania i ka ofruar Polonisë sisteme mbrojtëse, Patriot dhe Eurofighters, për mbrojtje të hapësirës ajrore.

Më 14 nëntor, dy polakë u vranë kur një raketë goditi një depo gruri në fshatin Pzhevoduv, vetëm 6 kilometra nga kufiri me Ukrainën.

Sekretari i Përgjithshëm i NATO-s, Jens Stoltenberg, deklaroi një ditë më pas se sulmi i së martës në Poloni me gjasë u shkaktua nga mbrojtja ajrore e Ukrainës, por shtoi se Rusia mbetet fajtore pasi ajo e nisi luftën.