Shqipëria dhe Kosova bojkotojnë ceremoninë e çmimit Nobel

Ambasada shqiptare në Suedi tha dje pasdite se do ta bojkotojë ceremoninë e Akademisë së Çmimit Nobel në të cilën do t’i akordohet ky çmim i lartë për letërsinë shkrimtarit austriak Peter Handke.

Në një letër dërguar organizatorëve të Ceremonisë, ambasada shqiptare u shpreh se e ndërmerr këtë hap në shenjë proteste kundër përkrahjes dhe mbështetjes që z. Handke i ka dhënë politikave shoviniste të Sllobodan Millosheviçit.

Të shtunën, Kosova deklaroi se do të bojkotojë ceremoninë e ardhshme të Nobelit, ndërsa vendimin e komunikoi ministri i Jashtëm në largim Behgjet Pacolli.

“Kosova nuk do të marrë pjesë në ceremoninë e Nobelit në Stokholm këtë vit”, shprehet Pacolli, ndërsa konfirmon se ambasadorja Shkendije Geci-Sherifi do ta bojkotojë këtë ngjarje, pas nderimit me Çmimin Nobel “të mikut dhe mbështetësit të politikës së Millosheviçit”.

Pacolli i bëri thirrje edhe Shqipërisë të ndërmarrë të njëjtin hap.

Më 10 tetor shkrimtarët Olga Tokarczuk dhe Peter Handke u shpallën fitues të çmimit Nobel, por nderimi i austriakut Handke u prit me kritika për shkak të deklaratave të tij radikale të përkrahjes së regjimit të Millosheviçit dhe mohimit të masakrës së Srebenicës.

Bombardimin e Serbisë nga NATO ai e ka përshkruar si krim lufte, deklaratë që është kritikuar masivisht. Në sqarimin e saj zyrtar lidhur me rastin, Akademia Suedeze ka thënë se Handke është vlerësuar për vlerat e tij letrare dhe jo pikëpamjet e tij politike.