100-vjeçarja, tifozja më e zjarrtë e Tironës

Nezihat Stermasi, bashkëshortja e legjendës bardheblu, Selman Stërmasi, festoi dje ditëlindjen. Për të ky vit nuk mund të ishte më i bukur, pasi përkon me 100-vjetorin e krijimit të ekipit të zemrës, Tironës si dhe shpalljen kampion të tij.

E rrethuar me fanellën, topin dhe flamurin e ekipit të saj të zemrës, këto ngjyra, i kujtojnë me mall bashkëshortin e saj, Selman Stërmasin.

“Nuk i ndaj, i kam në zemër. E kam pas atë Selamin që nuk e kishte Shqipëria, ka qenë njeri shumë i mirë, nuk vinte re se nga është, i priste të gjithë njerëzit njësoj, minutë për minutë e kujtoj, po ku e kam. Ka qenë shpirtmirë, bujar”, thotë znj. Nezihat.

Në këtë 100-vjetor, ajo ndihet e plotësuar dhe e lumtur për historinë që do t’i lërë qytetit të saj.

“Për mua ka qenë jeta e mirë, me njerëz të mirë, me nipër e mbesa. Plot njerëz më kanë dashur dhe i dua. Po bëhem 100 vjeçe, tani presim nga pak…do të vijë ajo ditë patjetër. Kam lindur në Tiranë edhe po vdes në Tiranë”, thotë ajo.