Serbia përbën kërcënim për shtetin dhe ekzistencën e Kosovës, thotë Kurti

“Mohimi i shtetit dhe pavarësisë tonë nga ana e Serbisë, përbën kërcënim të vazhdueshëm jo vetëm për shtetin tonë por edhe për ekzistencën tonë”.

Kështu u shpreh kryeministri i Kosovës, Albin Kurti gjatë një konference të përbashkët për shtyp me ministrin e Punëve të Brendshme, Xhelal Sveçla këtë të diel në Prishtinë.

Kurti nënvizoi se paligjshmëria nuk do të tolerohet në asnjë pjesë të Kosovës.

Serbia nuk po e fsheh se kërkon rikthim në Kosovë, pra në esencë kërkon të vazhdojë luftën, luftën të cilën e humbi dhe kapitullimin e pranoi aso kohe në 1999, andaj edhe mohimi i shtetit dhe pavarësisë tonë nga ana e Serbisë, përbën kërcënim të vazhdueshëm jo vetëm për shtetin tonë por edhe për ekzistencën tonë.

Paligjshmëria nuk do të tolerohet, nuk do të durohet në asnjë pjesë të vendit tonë. Unë ftoj të gjithë serbët në Kosovë që të punojnë bashkë me neve, të jetojnë bashkë me neve, të kuvendojnë bashkë me neve, të qeverisin bashkë me neve”, theksoi ai.

Misioni i Bashkimit Evropian për Sundimin e Ligjit në Kosovë, EULEX, ka konfirmuar se një shok bombë është hedhur ndaj një patrulle vëzhguese mbrëmjen e së shtunës, në afërsi të Rudarës, në komunën e Zveçanit.

EULEX-i bëri të ditur se asnjë zyrtar i Njësisë Policore të Specializuar nuk është lënduar dhe nuk janë shkaktuar dëme materiale, por i cilësoi sulmet e tilla të papranueshme.

Ndër të tjera, EULEX-i njoftoi do të vazhdojë punën për ruajtjen e stabilitetit në Kosovë dhe për sigurinë e qytetarëve.

LEXONI GJITHASHTU

• Sveçla thirrje serbëve: Largoni menjëherë barrikadat në veri
• Kurti: Serbia po kërkon të vazhdojë luftën të cilën e humbi
• ‘Shmangni përshkallëzimin’, Borrell reagon pas sulmit ndaj EULEX-it në veri