Sveçla thirrje serbëve: Largoni menjëherë barrikadat në veri

Ministri i Punëve të Brendshme të Kosovës, Xhelal Sveçla u bëri thirrje serbëve lokalë që të largojnë menjëherë barrikadat në veri.

Thirrjen, Sveçla e bëri gjatë një konference të përbashkët me kryeministrin e Kosovës, Albin Kurti këtë të diel në Prishtinë.

Sipas tij, nuk mund të lejohet që bandat kriminale të pengojnë qarkullimin dhe lëvizjen e lirë të qyetetarëve.

“Meqë barrikadat e vendosura dje nuk janë hequr ende, i bëj thirrje qytetarëve serbë që të mos bëhen pjesë organizimeve të këtyre grupeve kriminale, ndërsa iu bëj thirrje organizatorëve për largim të menjëhershëm të barrikadave. Ne nuk mund dhe nuk do të lejojmë që bandat kriminale të organizojnë e të pengojnë qarkullimin dhe lëvizjen e lirë të qyetetarëve tanë”, theksoi ai.

Misioni i Bashkimit Evropian për Sundimin e Ligjit në Kosovë, EULEX, ka konfirmuar se një shok bombë është hedhur ndaj një patrulle vëzhguese mbrëmjen e së shtunës, në afërsi të Rudarës, në komunën e Zveçanit.

EULEX-i bëri të ditur se asnjë zyrtar i Njësisë Policore të Specializuar nuk është lënduar dhe nuk janë shkaktuar dëme materiale, por i cilësoi sulmet e tilla të papranueshme.

Ndër të tjera, EULEX-i njoftoi do të vazhdojë punën për ruajtjen e stabilitetit në Kosovë dhe për sigurinë e qytetarëve.

LEXONI GJITHASHTU

• Kurti: Serbia po kërkon të vazhdojë luftën të cilën e humbi
• ‘Shmangni përshkallëzimin’, Borrell reagon pas sulmit ndaj EULEX-it në veri
• ‘Kosova do të mbrohet me forcë dhe vendosmëri’, Kurti i përgjigjet Vuçiçit