Në kërkim për krime ndaj personit, kapet me armë zjarri gati për qitje 27-vjeçari

Një 27-vjeçar i shpallur në kërkim për krime ndaj personit është arrestuar nga policia. Sipas bluve të kryeqytetit, shtetasi L. K., 27 vjeç, banues në Durrës është vënë në pranga nga forca e posaçme “Shigjetat” pas disa minutash ndjekjeje, teksa tentoi t’i shmangej pikës së kontrollit.

“Forca e posaçme ‘Shigjetat’ ka konstatuar një mjet që ka ndaluar 100 metra larg pikës së kontrollit te Pallati me Shigjeta.

Drejtuesi i mjetit ka dalë nga mjeti dhe ka ikur me vrap duke mbajtur një çantë në dorë. Menjëherë punonjësit e Policisë së forcës së posaçme “Shigjetat” janë vënë në ndjekje të personit, i cili kur ka parë që po e ndiqte Policia ka hedhur në një kosh armën e zjarrit dhe është larguar me shpejtësi

Pas afro 10 minuta ndjekjeje, “Shigjetat” kanë kapur dhe prangosur shtetasin L. K., 27 vjeç, banues në Durrës”, sqaron policia.

Shërbimet e Policisë kanë gjetur dhe sekuestruar edhe armën e zjarrit tip pistoletë me fishek në fole gati për qitje dhe një krehër me fishekë luftarak.

Ndaj këtij shtetasi me precedentë të theksuat kriminalë rëndojnë një sërë akuzash si “Vrasja me paramendim” dhe “Armëmbajtje pa leje”, “Kanosja”, “Shkatërrim i pronës”, “Kundërshtim i punonjësit të policisë së rendit publik”, “Mosbindje ndaj urdhrit të punonjësit të policisë të rendit publik” dhe “Armëmbajtje pa leje”.