Punimet për Teatrin e ri Kombëtar, protestuesit e PD-së të pozicionuar në 3 zona

Teksa pritet që të nisë ceremonia për nisjen e punimeve për Teatrin e ri Kombëtar, përfaqësues të Partisë Demokratike, por jo vetëm kanë vendosur të protestojnë.

Gazetari i Euronews Albania, Ardit Hoxha raporton se protestuesit e PD-së janë vendosur në tre zona të ndryshme, teksa në pjesën ku do të zhvillohet ceremonia, është vendosur perimetri i sigurisë.

Ndër të tjera, Hoxha u shpreh se në protestë janë edhe aktivistë të Aleancës për Mbrojtjen e Teatrit dhe të Shoqërisë Civile.

“Në orën 10:30 minuta, pritet të fillojë ceremonia zyrtare e nisjes së punimeve për Teatrin e ri Kombëtar, në pjesën ku dy vite më parë u shemb godina e vjetër. Duke qenë se në këtë ceremoni do të marrin pjesë, si kryetari i Bashkisë së Tiranës, zoti Erion Veliaj, por edhe kryeministri Rama, nga ana tjetër, nga Shoqëria Civile, por edhe aktivistë të PD-së, është lajmëruar një protestë për të kundërshtuar këtë nisje të projektit për Teatrin e ri Kombëtar, pasi kërkesa e aktivistëve, Shoqërisë Civile, të Aleancës për Mbrojtjen e Teatrit, por edhe të funksionarëve dhe mbështetësve të PD-së, ka qenë që Teatri i ri Kombëtar të ngrihet aty ku ishte.

Ka forca të shumta policore të Policisë Bashkiake, pasi gjatë këtyre minutave që ekipi i Euronews Albania ka qenë në të gjithë zonën që është vënë në perimetër sigurie, kemi dalluar vetëm forca të Policisë Bashkiake dhe nuk kemi vënë re forca të Policisë së Shtetit. Protestuesit apo mbështetësit e PD-së janë grupuar në tre pika të ndryshme. Njëra nga pikat është përballë Ministrisë së Brendshme, një pikë tjetër është në krahun tjetër të pedonales dhe pika tjetër aty ku po bëhet hyrja e personaliteteve në pjesën ku ndahet Bashkia e Tiranës me kompleksin e ministrive”, raportoi Hoxha.

LEXONI GJITHASHTU

• Nisin punimet për teatrin, bllokohet pedonalja, Aleanca organizim për protestë
• Trafik droge nga Shqipëria, arrestohen 14 persona në Itali, 5 prej tyre shqiptarë
• Falsifikonin dokumente të ndryshme, kundrejt parave, tre të arrestuar në Tiranë