Të burgosurit takime me familjarët e fëmijët, por në ambiente të papërshtatshme

Fëmijët dhe familjarët e personave që vuajnë dënimin në burgun e Drenovës kanë pasur mundësi të takojnë të dashurit e tyre në prag të festave të fundvitit.

Për të dënuarit kjo ishte një ditë ndryshe, por për fëmijët ambienti ku ata takohen me prindrit nuk është i përshtatshëm. Aktivstja Enkelejda Fejzo tregon cilat janë problematikat që hasin fëmijët kur takojnë prindin e dënuar.

“Problematika fillon që nga pjesa e takimit të prindërimit të fëmijëve, që është një mungesë shumë e madhe sepse fëmija gjatë kohës se takimit me prindin i mungojnë shumë ambiente të bukura që mos kuptojë që prindi po vuan një dënim. Kjo është një nga gjërat që duhet stimuluar e nuk duhet harruar. Fëmijët janë ata që preken nga mungesa e prindërve, e gjithashtu edhe bibliotekat e burgjeve dhe komunikimi me i qarte me familjarët,” – u shpreh ajo.

Një nga të burgosurit që po vuan dënimin tregon se ka nevojë që ambientet për fëmijët që takojnë prindërit e tyre duhet të jenë më të përshtatshme.

“Duhet të ketë ambiente më të përshtatshme për këtë kategori pasi duke qenë se vet ambienti e të gjithë kuptojnë se është një institucion tjetër, është jetese tjetër, nuk është rutina e përditshme jashtme. Mendoj se këto kushte duhen përmirësuar me tepër,” – tha i dënuari Joni Mosku.

Burgu i Drenovës është një nga burgjet me të rëndësishme të vendit, për shkak edhe të sigurisë së lartë që ai mbart ndërkohë që kohët e fundit është duke vuajtur edhe nga mbipopullimi i të burgosurve.

LEXONI GJITHASHTU:

• Murrizi bën deklaratën e fortë: Ardian Dvorani e ka vendin në burg!
• Pendarovski: S’do ketë drejtësi në RMV nëse nuk shohim gjykatës e prokurorë në burg