Në Korçë s’ka blerës, çmimet boshatisin tregjet

Në tregun e Korçës është e vështirë të shohësh njerëz që blejnë. Këtë problem e tregojnë edhe shitësit.

“Bulmet, djathë, gjalpë, kaçkavall, speca me gjize. Çmimet njëlloj i kemi mbajtur, nuk ka rritje. Fuqia blerëse është e pakët. S’kanë mundësi, s’kanë para. S’do mend, e tërë tek ekonomia është. Plus emigrantët nuk kanë ardhur, ata kanë lek, lëviznin, ata rrinë Greqi,” – u shpreh një shitës.

 “Shes gjëra të thata, hudhra, piperka, qiqra, gjëra që duhen për Vitin e Ri. Arra, bajame, lajthi. Nuk i rris çmimet, siç kanë qenë. Çmimet nuk janë rritur por s’ka treg. Nuk ka fuqi blerëse,” – u shpreh një tjetër shitës.

Ndërsa ndryshe ndodh në dyqanet e mishit, ku edhe pse çmimi është rritur, sërish ka blerës.

“Gjithmonë çmimet variojnë të jenë shumë më shumë të ngritura. Do ishte mire te ndryshonte për një periudhë të shkurtër, sepse të gjithë njerëzia duan të mbushin atë natë atë tavolinë. Pothuajse të gjithë llojet e mishrave janë ngritur, sidomos të pulave. Njerëzit vijnë me pak se vjet, gjithsesi mundohen për atë natë,” – u shpreh një tregtar.

Në shumë qytete situata duket e njëjtë, ku edhe pse çmimet nuk janë rritur, nuk ka blerës.