Dygjuhësia ngre tensione në Maqedoninë e Veriut, shqiptarët nuk duan ndryshime

Ligji për përdorimin e gjuhës shqipe ka nxitur debate në Maqedoninë e Veriut pas vlerësimit të Komisionit të Venecias për pezullimin e përkohshëm të tij. Kryetari i BDI-së në pushtet, Ali Ahmeti kërkon që ky ligj të mos keqpërdoret për qëllime politike.

 “Është ligj që buron nga vetë marrëveshja paqësore e Ohrit, si dokument i rëndësisë së veçantë me garanci ndërkombëtare, mbështetet nga Evropa, Amerika, NATO-ja. Dhe sigurisht që Komisioni i Venedikut si material është dorëzuar për një mendim, dhe ne i vlerësojmë mendimet që janë dhënë nga ky komision”, – thotë Ali Ahmeti, kreu i BDI.

Kryeparlamentari Talat Xhaferi ka siguruar se ligji nuk mund të ndryshohet pa vullnetin e shqiptarëve, pasi pa deputetët shqiptarë nuk arrihet shumica në Kuvend.

 “Në aspektin esencial duhet pasur parasysh se ka grup ligjesh të cilat nuk varen vetëm si nga shumica e përgjithshme, por ka nevojë për shumicë të dyfishtë, grup i ligjeve ku hyn edhe ligji për përdorim të gjuhëve, që nënkupton se përskaj shumicës së përgjithshme, duhet të ketë edhe shumicën e dyfishtë”, -u shpreh kreu i Kuvendit të Maqedonisë së Veriut, Talat Xhaferi.

Ditë më parë Komisioni i Venecias publikoi vërejtjet dhe rekomandimet për ligjin e përdorimit të gjuhëve. Një nga sugjerimet ka të bëjë me pezullimin e përkohshëm të përdorimit të gjuhës në gjyqësor.