555-vjetori i vdekjes së Skënderbeut | Begaj vendos kurorë në Memorialin “Skënderbe”

Presidenti i Republikës, Bajram Begaj vendosi sot një kurorë në Memorialin “Skënderbe” në qytetin e Lezhës, në përkujtim të 555-vjetorit të vdekjes së Heroit Kombëtar, Gjergj Kastriot Skënderbeu.

Në fjalën e tij gjatë një aktiviteti përkujtimor të organizuar nga Bashkia Lezhë, Begaj u shpreh se jeta e Gjergj Kastriotit na kujton origjinalitetin e forcën e një populli autokton, pa orekse për territore që nuk i përkasin, por i palëkundshëm nga trojet e veta.

Kreu i Shtetut theksoi se jeta e Gjergj Kasriotit tregon suksesin e besimit tek vetvetja, pa i lakmuar askujt asgjë dhe se ai nuk është një legjendë, është një hero, por mbi të gjitha është një e vërtetë.

“Gjergj Kastrioti është Heroi ynë Kombëtar dhe ne i jemi mirënjohës për luftën, përpjekjet, sukseset dhe shembullin. E shqiptarët dinë të jenë mirënjohës. Por, Gjergj Kastrioti ishte mbi të gjitha një shqiptar si të tjerë në mote e sot, që kanë në zemër dashurinë për këtë tokë, kanë besim në cilësitë e tyre, dhe dinë të arrinë suksese për vete e për shumë të tjerë. Këta shqiptarë janë në Shqipëri e kudo në botë,” nënvizoi ndër të tjera Presidenti Begaj.

LEXONI GJITHASHTU

• Rama: Kemi nevojë që ta njohim dhe vlerësojmë më mirë figurën e Skënderbeut
• Boraj: Ora e Franck Muller me portretin e Skënderbeut, mund të jetë porositur
• Kompania zvicerane prodhon orën luksoze me portretin e Skënderbeut