Pas 20 vitesh pritje, hapet pika kufitare mes Kumanovës dhe Preshevës

Maqedonia e Veriut dhe Serbia firmosën sot marrëveshjen bilaterale për hapjen e pikës së kalimit kufitar Llojan – Miratoc, që lidh Kumanovën dhe rrethinat e saj me Luginën e Preshevës në Serbi.

“Ky vendkalim kufitar është problem me të cilin banorët e dy komunave po përballen tashmë 20 vite. Ky vendkalim kufitar fillimisht do të shërbejë si vendkalim lokal, por me përmbushjen e kushteve, pika kufitare do të jenë në funksion të të gjithë vendeve të rajonit”- u shpreh Oliver Spasovski, ministër i brendshëm i RMV-së.

Nga ana tjetër ka reaguar edhe ministri i brendshëm i Serbisë, Nebojsha Stefanoviq, i cili ka thënë se “ndjehem mirë që po tregojmë përkushtim për t’a bërë më të lehtë jetën e qytetarëve”. 

Kjo marrëveshje së shpejti pritet të ratifikohet nga Kuvendet e të dyja shteteve. Ndërkohë për vendkalimin Bellanoc-Stançiç, mes Maqedonisë së Veriut dhe Kosovës, ende po pritet përgatitja teknike e palës kosovare.

Në takimin mes ministrave të brendshëm të Maqedonisë dhe Serbisë u fol dhe për punën e përbashkët kundër trafikimit në disa sfera. Ministrat njoftuan se janë zbuluar dhe ndaluar gjithsej 21 mijë migrantë që përmes Maqedonisë së Veriut kanë tentuar kalimin në territorin serb.