Akuza e re, reagon Gruevski: Pushteti vazhdon me përndjekjen politike kundër meje

Ish-kryeministri i Maqedonisë së Veriut, Nikolla Gruevski dyshohet për keqpërdorim te fondeve të partisë të cilën drejtonte, VMRO DPMNE-së.

Sipas prokurorisë për krim të organizuar, nga viti 2006 deri në vitin 2012 Gruevski ka fshehur një pjesë të donacioneve që jepeshin për partinë. Me vonë me ato para, rreth 1.3 milionë euro gjithsej, ka blerë tokë në një zonë luksoze pranë Shkupit. Vetëm disa kohë më pas, ai e ka shitur sërish tokën.

Për të mbuluar këto veprime, paratë janë transferuar përmes një kompanie off-shor nga Belize, ndërsa procesin e ka udhëhequr kushëriri i Gruevskit, ish-drejtor i Drejtorisë për Siguri dhe Kundërzbulim, Sasho Mijallkov. 

Përveç tyre, edhe 4 persona të tjerë dyshohen për përfshirje në veprën penale, ndërsa njëri prej tyre u dërgua në paraburgim. Ish kryeministri Gruevski përmes rrjetit social Facebook hodhi poshtë akuzat dhe tha se bëhet fjalë për përndjekje politike ndaj tij.

“Pushteti vazhdon me përndjekjen politike kundër meje dhe të tjerëve, që i përndjek me qëllim të nxjerrin deklarata të pavërteta për mua”, është shprehur ish-kryeministri.

Nga nëntori i vitit 2018 Gruevski gjendet në Budapest të Hungarisë në arrati për shkak të proceseve gjyqësore ndaj tij.