Rama tjetër apel naftëtarëve: Dilni nga greva dhe bisedojmë, hallin s’ua shkaktoi qeveria

Kryeministri Edi Rama iu drejtua sërish të mërkurën naftëtarëve të rafinerisë së Ballshit duke u kërkuar që ata “të dalin nga greva e urisë”.

Përmes një postimi në Twitter, kryeministri tha se “ata duhet të dalin nga greva që të bisedohet për zgjidhjen”.

Sipas Ramës “hallin e naftëtarëve nuk e ka shkaktuar qeveria” dhe se ajo “nuk ka shkop magjik”, por vetëm “vullnetin për t’ua lehtësuar situatën”.

Naftëtarët duhet të dalin nga greva që të bisedojmë për të mos i lënë vetëm në këtë hall që as e ka shkaktuar qeveria, as zgjidhet me presion e me ultimatume! Ne nuk kemi shkop magjik, po kemi gjithë vullnetin të lehtësojmë situatën. Me logjikë dhe solidaritet si një familje.

— Edi Rama (@ediramaal) October 21, 2020

Ky është apeli i dytë i kryeministrit në Twitter ndaj naftëtarëve pas atij të bërë të hënën ku sërish qe shprehur “i gatshëm për të biseduar me ta”.

Opozita e ka akuzuar qeverinë se ajo është shkaktare për situatën e krijuar me naftëtarët, të cilët kanë 16 paga pa marrë, ndërkohë që rafineria e Ballshit nuk punon prej muajsh pasi kompanitë që e administronin kanë mbyllur aktivitetin pas deklarimit në humbje.

Nga ana tjetër qeveria ka hedhur poshtë pretendimet e opozitës duke e akuzuar atë se kur qeveriste vendin e privatizoi rafinerinë në mënyrë korruptive duke i lënë vend abuzimeve.

Prej më shumë se 25 ditësh naftëtarët protestojnë me grevë urie për të marrë pagat dhe për të rinisur punën në rafineri. Javën e fundit grevën e kanë vijuar gratë, ndërsa në një intervistë të fundit ato kanë deklaruar se nëse nuk do të marrin përgjigje për kërkesat e tyre, grevës do t’i bashkohen edhe fëmijët e tyre.

Lexoni gjithashtu:

Dita e shtatë e grevës së naftëtareve: Nëse s’marrim përgjigje do të na bashkohen edhe fëmijët

Rama apel naftëtarëve të mbyllin grevën: I gatshëm të bisedoj me ta