Furnizonte dyqanet me kafe kontrabandë, arrestohet 39-vjeçari në Tiranë (EMRI)

39-vjeçari Abdi Maha ka rënë në prangat e policisë ditën e sotme, pasi dyshohet se furnizonte dyqane të ndryshme, me pako me kafe, të dyshuara të kontrabanduara dhe fshihte të ardhurat e përfituara nga ky aktivitet.

Policia bën me dije se janë sekuestruar dhe 400 kg kafe e dyshuar e kontrabanduar dhe 7 pajisje për përpunimin e kafesë.

“Gjatë operacionit, shërbimet e Policisë kanë ndaluar në Unazë të Madhe, automjetin me drejtues shtetasin Abdi Maha. Gjatë kontrollit të automjetit dhe kontrollit të banesës së këtij shtetasi, shërbimet e Policisë gjetën 400 kg kafe të dyshuar të kontrabanduar, të ndarë në pako, me të cilat ky shtetas furnizonte disa dyqane, në zona të ndryshme të Tiranës. Sasia e kafesë u sekuestrua në cilësinë e provës materiale, së bashku me 7 pajisje që shërbejnë për përpunimin e saj.”- njofton policia.

39 vjeçari akuzohet  për veprat penale “Kontrabanda me mallra që paguhet akcizë”, “Tregtimi dhe transportimi i mallrave që janë kontrabandë”, “Mospagimi i taksave dhe tatimeve” dhe “Fshehja e të ardhurave”.

Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.

LEXONI GJITHASHTU: 

• Parashikoi goditjen e fortë në Turqi, shkencëtari paralajmëron tërmetin e radhës
• “Deklarata e Dobit është e rreme”, flet avokati i Alda Klosit që u la në burg